歐洲坊呈獻：《譚耀文 In Full CHARACTER》演唱會

《歐洲坊呈獻：譚耀文 In Full CHARACTER 演唱會》將於12月2號喺旺角麥花臣場館舉行。大會日前特別舉行記者會公布詳情，除咗主角譚耀文，主辦單位、贊助商同《聲‧秀》學員胡港豐、布子殷、蕭凱恩，以及多位粉絲都有到場支持。

阿譚透露，今次係佢入行37年以嚟首次個唱，感覺好夢幻：「今日上台聽到大家嘅歡呼聲，好感動。多謝主辦、朋友同粉絲嘅愛，真係好感恩。」佢仲話演唱會歌單構思咗好多年，除咗有影視歌曲，亦有出道初期嘅作品、懷念環節同致敬巨星橋段，「有啲歌我從未唱過，今次特登攞返出嚟，用音樂同戲劇結合，總結我嘅演藝旅程，希望觀眾睇得開心又有驚喜。」

當日主辦單位為阿譚準備咗驚喜影片，一班圈中好友包括郭富城、鄭秀文、佘詩曼、張智霖、梁詠琪、陳偉霆、陶大宇、伍詠薇等紛紛拍片打氣，令阿譚感動到眼濕濕：「我平時好man㗎，但睇到咁多朋友支持，真係頂唔順！」

《聲‧秀》學員亦送上蜂蜜禮盒為導師潤喉，並會一齊登台表演；冠名贊助「歐洲坊」就送上1988年紅酒，紀念阿譚奪新秀冠軍嘅年份；「一幻拉麵」送上特製拉麵，主辦單位陳淑芬（陳太）更加將音樂劇《風雲》入面阿譚嘅手腕護甲送返畀佢，勉勵佢繼續堅持。

記者會最後，阿譚聯同主辦及贊助代表舉行祝酒儀式，祝願演唱會圓滿成功、門票大賣。門票將於10月13號中午12點於輪住買及Pato Tix優先訂票，10月16號起Cityline公開發售。